Mar 9 | APZ | STEP | Jisas kako oso a'amu somo ulɨmento, Ngko hungkuno nehopi waselɨmonne'no yohono. A'amu olo hwaho lopo nakwo'nji olohonta humalofo fehohnjoso mape'nontanɨngkuji Anɨtu kakoe yokumpohn'nyo'nji a'amumo wopɨngo wonyoangkafo mokosyohumayo somo uhwonantɨfeho. Ose ulɨmentisofoho.

Mark 9

1 Jisas kako oso a'amu somo ulɨmento, Ngko hungkuno nehopi waselɨmonne'no yohono. A'amu olo hwaho lopo nakwo'nji olohonta humalofo fehohnjoso mape'nontanɨngkuji Anɨtu kakoe yokumpohn'nyo'nji a'amumo wopɨngo wonyoangkafo mokosyohumayo somo uhwonantɨfeho. Ose ulɨmentisofoho.

Jisasɨye a'apaho nom'ne kengo imo'nɨmentisofoho.

(Matɨyu 17:1-13; Luk 9:28-36)

2 Sɨkuno aho fehohnjo hopi'nono fehohnta'ni anga'no memjaofahonɨngki Jisas kako Pita'nji Jemɨsɨ'nji Jounja oso hwamo nutɨmanto hofɨko hwofɨki'nyo sawemo engo sopono nokotasontɨfi hofɨko'nohini nohumentanɨngkofi Jisasɨye a'apaho nom'ne kengo imo'nɨngkahonɨngki hofɨko uhwonɨmentohofofoho. 3 Jisasɨye manji'mofo nɨhu'no halojo imo'nonto mofehi'nyo pa'nyo imo'nɨmentisofoho. Oso manji'mofo halojoso a'amu olo hwaho lopo oso halojo pa'nyoso mamtɨ'mokufitnnehofo. 4 Inomokomoyo sohwa uhwonɨmentohofoso Ilaija'nji Mousesɨ'nji ahwomo mta'ango sohwa'u Jisasɨmo u'manji hungkuno hnnɨmentohofofoho. 5 Pita kako huno pi'nɨngo syofɨsikaofonto Jisasɨmo ulɨmento, Nakwoe Lonetɨhwayohwosi, nakwo olopo humentani sehonɨngkuhwoneso wopɨngofoho. Olo hilo so'no syafɨsiyo'neso ango hufa'u sɨhune womolantane'no yɨhwono. Anga'no kɨko'nefoho. Anga'no Mousesɨmnefoho. Nom'neso Ilaijamnefoho. 6 Pita kako oso hiso'no huno ito'no muyahonɨngki ose ulɨmentisofoho. Inomokomoyo sohwa iyoho we'e unɨmentiso'maho. 7 Osohonta himo hofɨkimo ifeehu'mokosyahonɨngki mampaho himo mta'ango ole ho'nɨmento, Olohwo nje Hwomufoho. Ngko sɨmeho uyɨwo'nɨngkohe hweho. Kakoe hungkunomo sekwo upa'nɨmno. 8 Ose upa'nontɨfi fe'nɨhwonɨmentohofoso hwe ahwomo mta'ango sohwa'u ne'no anepo uhwonɨmentohofofoho. Jisasɨ'nohini humentanɨngki uhwonɨmentohofofoho.

9 Jisasɨ'nji inomokomoyo sohwanji hwofɨki'nyo hopo sopo nokotapontɨfi Jisas ulɨmento, Olo sekwo uhwonɨngkohofo loso'no olohonta a'amumo nulɨkutoho. I, hwangku ngko A'amufe Hwomu sohwo'ni poyo imo'nɨ'me'no Anɨtu apa'no ntokafoso sohonta sekwo a'amumo olo uhwonɨngkohofo loso'no ulɨfijo. 10 Ose ulahonɨngki hofɨko a'amu nom'ne somo ulɨmentohofo'maho. I, oso'no ole hnnɨmentohofi, Kako poyo pe'nɨngkuhwosi apa'no songo lɨkafo'ne hungkuno hwapɨngoso pipilo. 11 A'amu honɨngkano hungkuno lutɨhwamotofo sohwa ole lɨwo'nɨngkohofi, Ilaija kaki'no wapmmontonoho. Tɨfi sohonta Kɨlais hwe Anɨtu uhwosopo'mentiso sohwo wapmmontonoho. Oso hiso peho'no lalokwofo. 12 Ose ulahonɨngkofi Jisas ulɨmento, Ou, hungkuno nehopi lalokwofo. Ilaija kako sɨmo'mo nopɨhwosi yo'mayo hopi'nono ito'no wesyohumamtonoho. Hungkuno nom'ne mtɨ'mokumentohofoso ole, Hwe Anɨtu uhwosopo'mentiso sohwo olo hwaho lopo tohino engo tɨpemanefoho. A'amu sohwa oso hwe sohumo nakwolaho ulɨfitnnefoho. Oso'no sekwo huno fɨsyafɨhupmno. Ole selalokweno Hwe Ilaija kako pmmentisofoho. Nopahonɨngki a'amu hofɨkoe huno hwahoponjo tɨpemantɨfi hwe huhwo sohumo wonyo umokumentohofofoho. A'amu Anɨtuye hungkuno mtɨ'mokumentohofoso oso hiso'no hohonta mtɨ'mokumentohofoso olohonta ne imo'nɨmentisofoho.

Jisas hwomu towahuno wonyo'njo sohumo wopɨngo umokumentisofoho.

(Matɨyu 17:14-21; Luk 9:37-43)

14 Hofɨko nom'ne inomokomoyo sohwamo u'mantɨfi uhwonɨmentohofoso a'amu pi'nɨngo engo nohumentanɨngkofi a'amu honɨngkano hungkuno lutɨhwamotofo sohwanji inomokomoyo sohwanji yoka hnnɨmentohofofoho. 15 A'amu pi'nɨngo engoso Jisas nopontanɨngki uhwonontɨfi yomo yontɨfi hano komo'no wentɨfi Jisasɨmo u'mantɨfi, Nakwoe hwe engo hwosoho ulɨmentohofofoho. 16 Jisas inomokomoyo sohwamo ulɨmento, Sekwo yoka peho'no hnnalokwofo. 17 Ose ulahonɨngki hwe fihwo a'amu'nji ajwo so'mo humohumatiso sohwo ulɨmento, Nje Lontɨhwayo sohwosi, towahuno wonyo nje hwomumo mango mampi'nyo mesimokinyo. Oso'no kikiyepono ipemotapohono. 18 Towahuno wonyo sohwo nje hwomumo humanto wonyo kimokuwo'nɨngkisofoho. Kako hwomumo hwahopo kumokwojahonɨngki hwomu sohwo makutotafo sapɨwo'nɨngkisofoho. Saponto mango kilompusyɨwo'nɨngkisofoho. Kako a'apaho melohofafɨwo'nɨngkiso hweho. Oseso ngko jɨje inomokomoyo sohwamo ulohonɨngko, Towahuno wonyo lohumo wae feeopmno. I hofɨko hopo'maho.

19 Jisas ose nupa'nonto inomokomoyo sohwamo ulɨmento, Hwe moya'mi olohonta humalofo soku, sekwo Anɨtumo sɨmeho hi'ntnnono muyo kuyoho. Ngko sekwo'nji humayoso sɨkuno alale womemjanɨmo'montolɨkeno. Ngko sekwoe tango ngkimo nɨ'maneso sɨkunoso alale womemjanɨmo'montolɨkeno. Hwomu huhwo sohwo ngkiye pone'no utɨmotapmno. 20 Ose ulahonɨngki hofɨko hwomu ipemotopahonɨngkofi towahuno wonyo sohwo Jisasɨmo uhwononto kako hwomumo yomo yomo yokumpohn'nyo umokahonɨngki hwomu hwahopo pɨwasyonto, yɨwolo'mo yɨwolo'mɨngo lohofonto makutotafo halojo'nohino swapmmentisofoho. 21 Jisas kanɨngkwohumo ulohonɨmento, Sɨkuno alale yɨwo'nɨngkisoto. Ose ulahonɨngki ulɨmento hwomu we'e sohwo imentisofoho. 22 Fehonta tohomo kehwofitofasyonto fehonta mijomo kehwofitofasyonto wofonjahumonto iwo'nɨngkisofoho. Kɨko hopo'manji kɨko nakumo hitoho kilofɨhwoso'no, Fonefo'maho. 23 Ose ulahonɨngki Jisas ulɨmento, Ou, nehopi, jɨje sɨmeho hi'ntnnonohinoso hopo'manji yo'mayoso kɨko woma'monnoho. 24 Ose ulahonɨngki kanɨngkwohwo komo'no ulɨmento, Sɨmeho hi'ntnnono kijopalokweno. Oseso nje sɨmeho hi'ntnnonohinoso we'efoho. Nɨfo'maho.

25 Ose ulahonɨngki Jisas a'amu pi'nɨngo engo uhu'mokontanɨngkofi uhwononto, towahuno wonyo sohumo yoka ulonto ulɨmento, Towahuno wonyo sohwosi hwomu lohumo mampi'nyo imokuwo'nɨngkino hwosoho. Olo hwomu lohumo nɨhu'nahone ulɨko'maho. Apa'no nopaswohotoho. 26 Ose ulahonɨngki towahuno huhwo sohwo joho mohm'no lonto, hwomumo hwahopo kumokwajonto yomo yomo yokumpohn'nyo imokonto nɨhu'nahone ulɨko'ma'mentisoso hwomu sohwo poyo pa'nyo imo'nɨngkahonɨngki a'amu fiso ulɨmentohofi, Poyo pe'nɨngkohoho. 27 Oseso Jisas hwomu sohwoe aho nomanto ulɨkofahonɨngki hwomu sohwo lɨka'mentisofoho.

28 Jisas kakoe inomokomoyo sohwanji angomo noswontɨfi hofɨko'nohini nohumantɨfi Jisasɨmo ulɨmentohofi, Pipilo. Nakwo towahuno wonyo wae meeofesofo. 29 Ose ulahonɨngkofi Jisas ulɨmento, Sekwo Anɨtumo jomo ulɨfijoso sekwo oso towahuno huhwo sohwo wae yaopitnnehofo. Nom'ne honɨngkano awonoho.

Jisas kako poyo pe'nɨngkuhwosi apa'no lɨkafone so'no ulɨmentisofoho.

(Matɨyu 17:22-23; Luk 9:43-45)

30 Oso ango hopo sopo ulɨko'mantɨfi hofɨko hwaho Ngkalili ajwo sopo umentohofofoho. Jisas kako a'amu yofe manɨhwo so'njo uyɨfe lonto imentisofoho. 31 Hwapɨngoso ole, kakoe inomokomoyo sohwamo lutɨhwamne'ento imentisofoho. Kako ulɨmento, Ngko A'amufe Hwomu sohwo'nɨmo nje mango sohwafe aho somo ho'nonɨsyahonɨngkuji hofɨko wofonjonɨsyantɨfeho. Poyo imo'nɨmo sɨkuno hufa'u sɨhune memjanɨfɨhwoso'no Anɨtu apa'no ntokafonefoho. 32 Ose lutɨhwahonɨngki inomokomoyo sohwa hofɨko huno ito'no syafɨhu'mentohofo'maho. I oso'no Jisasɨmo ulohonyo so'no hofɨko iyoho imentohofofoho.

Hwe yofe engo'njo yakolo'nnyo tɨhwolo.

(Matɨyu 18:1-5; Luk 9:46-48)

33 Hofɨko pone Koponeyam i'mofapontɨfi osopo Jisas angomo nohumanto ulohonɨmento, Sekwo honɨngkanopo pehofo hnnɨngkohofo. 34 Inomokomoyo sohwa hofɨko wonɨmango unɨngkahonɨngki mampi'nyo humamentohofofoho. Hwapɨngoso honɨngkanopo ole hnnɨmentohofi, Nakwo sohwona'ni nakwoe hwe yofe'njo sɨmo'mjo tɨhwolo. Ose hnnɨmentohofofoho. 35 Jisas ampo humanto inomokomoyo sohwamo joho lutɨmanto ulɨmento, Sekwo hinjo hwasoho oyonɨmno. Upa'nɨmo. Hwe fihwo kako Anɨtuye tɨmopo hwe engo umo'nɨmo loso sohwo kako a'amufe tɨmopo hwe yofe ane pa'nyo imo'noso sohwo a'amumne'no momayo ulohofiyo hweho. Osohwo kako yofe engo'njo imo'none hweho. 36 Ose ulonto, mehomi fihwo utɨmanto, kakoe popapo momokosyohumanto inomokomoyo sohwamo ulɨmento, 37 A'amu fihwo kako olo mehomi lopa'nyo sohumo nje yofe ho'nonɨmayo'ne ufo'maso sohwo kako ngkimo nɨfo'mantofoho. A'amu fihwo ngkimo nɨfo'mayo oso pa'nɨngoso nje mpohwo ngkimo nɨhwatɨmentiso sohwo huhumo ufo'makwoho.

Hwe nakwo'njo hohnta'ni nefo'mayo sohwo nakwoe a'amufoho.

(Luk 9:49-50)

38 Ose ulahonɨngki Joun ulɨmento, Nakwoe Lonetɨhwayo sohwosi, nakwo uhwonɨmalohwoneso hwe fihwo kako jɨje yofe lonto, towahuno wonyo wae yaofontanɨngki uhwonɨmalohwonefoho. I oso'no kako nakwo kikimo tɨfi mokinɨngkowaloku yɨhwone so'no nakwo kakimo ulɨmalohwono, Kɨko Jisasɨye yofe'nji towahuno wonyo wae yaofohotoho. 39 Ose ulahonɨngkofi Jisas ulɨmento, Sekwo ose uloho'malofoso wonyofoho. Sekwo kakoe honɨngkanomo nopɨjumofɨkutoho. A'amu nje yofe lososo yo'mayo wonyoangkafo yososo kako ngkimo sitofo komo'no mantonehoho. 40 A'amu nakwoe syoho somo mohwempenamofehwo'manji nakwoe a'amu hweho. 41 Hungkuno nehopi selalokweno, Hwe fihwo sehonasoso huno ole wosyafɨhu'montono, Anɨtuye a'amu hwafoho. Ose syafɨsyɨhwosi mijo nyo'ne sejapososo, oso hwe sohumo Anɨtu wopɨngo uloho'mtonoho.

Yo'mayo wonyoso a'amufe sɨmeho hi'ntnnonohinomo wonyo imokiyofoho.

(Matɨyu 18:6-9; Luk 17:1-2)

42 Olo mehomi sɨmeho hi'ntnnono ntapɨwo'nyo sohumo a'amu huno wonyo'njo fihwo ulososo, Jisasɨmo hohujo fɨkinjaofo. Honɨngkano wonyo lomo tɨfi finɨngkayo. Ose uloso sohwo mehomi huhwo sohwo honɨngkano wonyomo inɨngkayo so'no oso hwe huno wonyo'njo huhwo sohumo Anɨtu tohino mɨkunɨmposo uyonefoho. Oso a'amu huhwo sohumo sojo mɨkunɨmposo engo so'nji kakoe tɨ'wangomo impe ifakojujɨkuji mijomo ho'naofontɨfijontentesi wopɨngo'nesohilo. 43 Jisas ose ulonto pahnnɨmo hungkuno ulɨmento, Oso'no jɨje aho honɨngkano wonyo imofonoho lohoji ahoso hwempeemo lohofohoji aho anga'nohono'nji honɨngkano wopɨngomo inɨngkahuji Anɨtuye angopo sohoji wopɨngo wohumamonnoho. Ou kɨko aho hufa'u'njo honɨngkano wonyo imojoso toho ne'no sijalokunjo somo uhnnefoho. Wonyo wohumamonnoho. 44 [Oso hopo sopo pihnnyo mape'nyofoho. Tohino ne'no wo'nnyoponoho. Toho hiso masɨmpe'nyofoho.] 45 Jɨje sɨfe honɨngkano wonyo imofonoho lohoji sɨfeso hwempeemo lohofohoji sɨfe anga'nohino'nji honɨngkano wopɨngomo inɨngkahuji Anɨtuye angopo sohoji wopɨngo wohumamonnoho. Ou kɨko sɨfe hufa'u'njo honɨngkano wonyo imojoso toho ne'no sijalokusomo uhnnefoho. Oso wonyofoho. 46 [Oso hopo sopo pihnnyo mape'nyofoho. Tohino ne'no wo'nnyoponoho. Toho hiso masɨmpe'nyofoho.] 47 Jɨje tɨmo honɨngkano wonyo imofonoho lohoji tɨhwotofamo lohofohoji tɨmo anga'nohino'njo honɨngkano wopɨngomo inɨngkahuji Anɨtuye angopo sisoso wopɨngofoho. Ou kɨko tɨmo hufa'u'njo honɨngkano wonyo imojoso toho ne'no sijalokunjo somo uhnnefoho. Oso wonyofoho. 48 Oso hopo sopo pihnnyo mape'nyofoho. Tohino ne'no wo'nnyoponoho. Toho hiso masɨmpe'nyofoho. 49 A'amu wopayopo sa mofɨkuji nɨfijoso me-eso wopɨngo uyɨmtonoho. Oso pa'nyo tohino yo'mayo tango ne'mahwoso'no yamofo nalohofonefoho. Yamofo hiso wopɨngo namokonefoho. 50 Nakwo wosopayo sa'nji nɨwo'nɨngkuhwoneso wopɨngofoho. I oso'no sa fosyo mijo'nohino imo'nɨngkuhwosi kakoe yokumpohn'nyo nonto wonyo imo'nososo apa'no sa hiso wopɨngo imo'nyoso pipi uyantanto. Awonoho. I oso'no sa wopɨngo pa'nyo hmmo'nɨmno. Sekwo a'amu nom'ne so'nji pompenjiyomo fohumantokuno.